Shkup, 18 prill – Në anketën e realizuar nga Agjencia për hulumtim të opinionit publik “Rejting”për gazetën “Dnevnik” të Shkupit, kryetari i Rilindjes Demokratike Kombëtare Rufi Osmani udhëheq bindshëm kundrejt liderëve të tjerë në bllokun politik shqiptar. Ai  ka rezultuar me rejtingun më të lartë dhe shumica e shqiptarëve në Maqedoni kanë mendim pozitiv për Rufi Osmanin.

Mendim pozitiv për Rufi Osmanin kanë 73% të shqiptarëve të anketuar, që shënon një rritje të mendimin pozitiv prej 21% prej muajit të kaluar, kur 52% ishin deklaruar se kanë mendim pozitiv për kryetarin e RDK-së.

Nga partia e Osmanit deklarojnë për agjencinë e lajmeve INA se kjo përqindje e lartë e mendimit pozitiv dhe besimit të shqiptarëve tek Rufi Osmani i përshkruhet menaxhimit të suksesshëm me komunën e Gostivarit në këto dy vite të qeverisjes së tij, transparencës, llogaridhënies dhe luftës pakompromis kundër korrupsionit.

“Të arritura të jashtëzakonshme janë shënuar në komunën e Gostivarit , komunë kjo kur u mor në menaxhimin kishte mbi 10 milion euro borxhe , vetëm për 2 vjet qeverisje me në krye Rufi Osmanin u paguan mbi 3 milionë euro borxhe, u realizuan mbi 3 milionë euro investime kapitale dhe u siguruan mbi 5 milionë euro fonde shtesë financiare nga institucione të huaja për investime në dy vjetët e ardhshme. Komuna e Gostivarit është e vetmja komunë që fitoi të drejtën të përcaktojë rejtingun kreditor nga Agjencioni Moody’s dhe se shpejti do të emetojë obligacionet e para komunale në vlerë prej mbi 1 milion euro. Parimi i kryetarit Osmani se paratë publike duhet menaxhuar me përgjegjësi dhe të jepet llogaridhënie për punën e bërë, siç duket janë virtyte që rrallë hasen te udhëheqës politikë të niveleve të tjera menaxheriale”, vlerëson RDK.

Ndonëse nuk ka akoma një muaj që nga promovimi i Rilindjes Demokratike Kombëtare më në krye Rufi Osmanin, në krahasim me partitë që veprojnë me vite të tëra në skenën politike RDK vazhdon të shënojë rritje në rejtingun e saj dhe numri i përkrahësve të RDK-së shtohet çdo ditë.

Mendimi i lartë pozitiv i shqiptarëve për kryetarin e RDK-së, z. Rufi Osmani është indikator i fortë se ai do të jetë faktor relevant në krijimin e politikave pozitive për shqiptarët dhe për qeverisjen e ardhshme të Maqedonisë.